ilemauricekaya mars 2001 |
Retour presse... |
ilemauricekaya le 1er janvier 2017 |
Pa ene poem ki mo pe ekrir
Kot pu kapav?
Kan nu fine truve sak ine derule la poezi
ine ale dan disan li fine noye
Sa pa ene poem
Zis ene fonnkèr
zis la duler
zis la koler
Ki mo ena dann mo leker
Ki non pu done zot
sa na ki ti fer sa
Mons! buro!
Zot mwens ki li syen anraze
O Kaya to ti pe sante
Mwa mo ne pli ena parol
Mwa mo ne pli ena sante
Mo selman anvi Kriye KRIYE KRIYE!
Nef mwa so mama ine mete
pu fer sa piti la
Komye fwa zot ti lev zot lebra
pu kraz la vi la?
Komye ku zot ti bizen done pu aret so sante?
Ek zot liniform
Ek zot matrak
Zot kapav paret kuma dimun
Zot pa ti dimun letan zot ti fer sa
Dir mwa...
Kan so disan ti pe kule
Dir mwa si zot ti pe riye, badine
Kan zot ti rant kot zot apre dir mwa
Dir mwa si zot ti may zot fam pu fer gate
Si zot ti kares seve zot piti
Nef mwa so mama ti port li
Kuma zot geyn drwa
Tir la vi la
Dir mwa si zot kapav bliye
Kan zot ti ape get li pe kreve
Kan zot ine bros so figir lor siman
Kan zot ine kas so le dan
Kan zot ine ris li par so lonf seve
pu kas so liku
Non zot pa pu bliye
Zame
Pars ki so la wa pu tuzur la
Ine travers miray Alcatraz
Ine al lor sime
lor montagne
Ine fransi la mer
Ene gran siklone la koler
Ene gran radmare la duler
Ene gran lapel lur
Sime la limyer
pu kas prizon rasism
pu kas baryer kominalism
Ekute .... EKUTE...
Zot tande?...
Ne pli ena narnye
pu protez zot
Ni zot famiy
Ni zot kamrad
Ni zot liniform
Zot pu tuzur tane
Kaya pe sante
Lor sime la limyer
Lor gran sime la limyer
Kaya pe sante
Kaya pe sante
Kaya pe sante...
En mémoire de Kaya 19 juillet 1999 |
Histoire révoltante France, été 1999 |
Sophie Rotbar Artsenik 21 fev 2001 |
les amis de Kaya réclament toujours justice 18 février 2003 |
ARTSENIK Ile de la Réunion 19 février 2009 |